辣媽CEO﹕小T的乒乓球賽

小T天生有運動細胞，溜冰游水跳舞各項球類運動都很快上手，參加比賽表現成績都尚算突出。以目前身高正追趕1.9米的他來說，打籃球應該是首選，但他看籃球的興趣比落場打更大。雖然他不說，我知道他真心喜愛的運動，非乒乓莫屬！

當年他還是初小學生的時候，隨教練和同學一起到內地乒乓球訓練中心受訓，我當然有隨隊出發。早餐後，整個上午訓練，他全程投入，沒有偷懶鬆懈；中午放飯時，見他走路一拐一拐，才知因為球鞋不合穿刮腳，為免影響訓練進度，他死忍死頂。幸好訓練中心有球鞋賣，趕緊帶他去買。脫下鞋襪，腳跟足踝皮破血流。為他包紮好後，極為心痛的我問他要不要休息，他堅持說要繼續。

今次去英國，執拾行李時，最記掛的還是他的乒乓球拍；一到埗即趕去參加遴選大學乒乓球代表隊。成功入選的他雄心壯志，積極參加乒乓球公開賽，希望贏獎金幫補開飯。結果前幾日收到他的信息，我們兩母子展開了以下的對話：

小T：「我想講我竟然輸畀個60幾歲嘅阿叔！真係輸經驗同心態，畀佢拎咗一局之後心態就爆炸！明明球球都拉到好到位，阿叔就係可以好奇怪地擋番返嚟。輸完嗰場之後成日都打唔好，一輸輸到尾。打多幾場應該會適應，阿叔打波真係唔同啲。」

克服心理 泰山崩前色不變

辣媽：「知道就好，呢個正正就係你嘅弱點！?家你應該知道點解咁多人佩服你阿媽，泰山崩於前而色不變，要克服幾多心理障礙關口。」

小T：「佢哋本地排名高過我哋大學隊。隊友都講咗會難打，但係真係先輸係輸自己！第一局輸完運之後，就係咁自暴自棄。」

辣媽：「孫子兵法有講知己知彼。你唔係輸運，要先贏自己先至會有運。The more you practice, the luckier you get!」

小T：「練唔夠波都係輸嘅因素之一。好似溜冰咁，用番細個學嘅時候嘅方法係行唔通嘅，要練番手感。中學學界同區域比賽始終兩個強度。中學到枱就贏，區域比賽拉埋波都會輸。打輸畀勁人知道自己弱，總好過打贏一堆弱雞以為自己勁好！」

遇強愈強 見識自己弱點

辣媽：「檢討改善進步，始終有機會獲得勝利，贏自己就係最大嘅勝利，所有嘅勝利都係輸番嚟嘅！睇吓Derrick Rose、Kobe Bryant，都是經歷過高山低谷，從失敗中被踐踏，從噓聲中捱出來的成功。球神Michael Jordan當初一樣畀人睇死，話佢根本唔識打籃球。?家你應該體會到點解我一直鼓勵你參加比賽，無非想你遇強愈強，見識過先至知道自己嘅弱點同埋缺點，媽媽一直想你明白嘅道理。當日你參加拉丁舞比賽，記唔記得媽媽同你講過，不要參加贏咗都唔光彩的比賽？你係一個好有智慧嘅年輕人，但係未曾經歷足夠嘅考驗磨練，暫時發揮到嘅都係小聰明。但我有信心，假以時日你一定可以大放異彩光芒，但這絕對不會是一朝一夕的事。」

作為母親，能和兒女有這種層次的溝通交流，終於望見家鄉了！

作者簡介﹕資深獵頭人，企業培訓顧問，家庭CEO，辣筆寸嘴，擅長對付怪獸家長

文﹕張慧敏

[Happy PaMa 教得樂 第216期]