論盡教育﹕呼籲學校拒收Portfolio

BB面試?一歲多啲,點面試吖?

到鴨脷洲探姨甥女,見她正為姨甥孫準備幼稚園面試的Portfolio,厚度逾一吋。她憂心忡忡女兒考不上,讀私立負擔不起,兼且區內幼稚園不多。看!這是香港家長的苦難,也是很多年輕夫婦寧願養狗仔也不敢生人仔的原因。生了人仔,奶粉唔係問題,最慘係搵學校難。生了BB,一歲左右就要報名幼兒班,報了名等面試,BB面試?一歲多啲,點面試吖?王師奶第一次聽這消息時,唔信係真事,於是扮鐘點湊仔婆陪同面試。接見的老師接過Portfolio,完全無睇,只是問孩子多大,檢查出生證明書,母親是否出外工作,誰照顧小孩,父親工作性質,接着叫我們帶同小孩見校長。王師奶留心那本做了好幾天的Portfolio,紋風不動仍在老師旁邊桌上,側邊仲有三幾十本。校長看看小孩,簡單和姨甥女傾兩句就說:「有進一步消息會通知你」。

幼稚園入學算是簡單,入小一就不得了,小婦人見過好多超過兩吋厚的Portfolio,豪華釘裝不在話下,內容豐富到不得了,從BB到成長的照片,從3歲到6歲的圖畫,獎狀一大堆,穿起跆拳道服的相片,鋼琴第一級及格證書,普通話進修證書。總而言之,我的孩子頂呱呱,驚天地,泣鬼神,務求打動校長教育英才的心,切勿錯過這未來的愛因斯坦、羅素、畢加索、梵高。

收集證書充場面

為了令Portfolio內容更充實,兩吋唔夠可以三吋,狗屎班、垃圾班乜都報,目的只為多一張證書。市面好多「刮龍」機構,改個嚇人名字如劍橋、哈佛、士丹福英語班;清華、北師大普通話班考試證書,面試3分鐘,盛惠375元。家長唔係懵得晒,明知做老襯,仍然樂意奉獻,為的就是那張印有魚目混珠名字的證書去充場面。學校是否不知市面好多這類呃人機構?當然唔係喇。所以好多學校根本不當Portfolio資料是一回事,交到來就放埋一邊,招生完畢仲要搵校工焚毁,勞民傷財,此之謂也。

王師奶記得有幾位校長勸說家長,不要製作比售樓說明書更豪華的Portfolio,交一張A4紙就足夠。王師奶特別向這幾位務實校長致敬,可惜有心人太少,不成氣候,所以製作精美的Portfolio仍陸續出現於試場中。據說有些家長不計腰頭錢,委託Graphic Designer製作,務求吸睛。

一張A4紙就夠

王師奶相信務實的校長不少,幼稚園、小學、中學的校長會和官方的家庭學校合作事務委員會,何不做件好事,發動屬下會員學校反璞歸真。不要以為這件是小事,這是教育移風易俗的事,是扭轉教育界歪風的事,是解救家長競逐奢華的事,是撲滅偽教育機構弄虛作假欺騙家長的事。講真話,大人的履歷一張A4紙足夠有餘,何况一個中、小、幼學生?校長們請做做好事,即使你們認為是小事,也請勿以善小而不為。

作者簡介﹕不是普通師奶,家中米缸有幾多斤唔知,但對香港教育界有幾多牛鬼蛇神,有幾多「嗚喱單刀」措施,卻一清二楚。「論盡教育」絕不手軟。[email protected]

文﹕王師奶

[Happy PaMa 教得樂 第216期]