保母

王師奶累積廿多年做家長的經驗，冷眼旁觀家長眾生相，雖是千奇百怪，卻可簡化為以下四大類： 放任型：有飯畀佢食，有瓦畀佢遮頭，有書畀佢讀，自覺已盡家長責任。成績好壞無乜所謂，深信天生天養，係龍就會飛上天，係蟲就會搵窿捐。做這類型家長的兒女禍福參半，禍是無父母扶持，一切靠自己；福是無壓力，可自由發揮潛能。世界就係咁奇妙，你以為呢啲仔女一定輸在起跑線，跌倒自己起番身，有血自己抹，做父母的盲字唔識多個。王師奶見過不少這類家長，兒女長進成才，靠獎學金入大學，長春藤大學搶住收。當然，比例不會太高，例子卻也不少。 開明父母與子女做拍檔 Partner型：這類父母最開明，深知強拗的瓜不甜，與其做冤家，不如做拍檔。做父母的當然希望子女成才，和子女有商有量，大家講明：我做好父母，你做好兒女，各司其職。凡事盡力就好，不強求，父母有要求，子女有目標，是父母兒女，也是彼此的partner。兒女在父母心中有期望，但不會給予他們成長的壓力。 教練有不同模式 如果你是教練型的家長，請你考慮兒女的承受能力，也請你檢討你的教練模式。 教練型：教練有好多種不同模式：泰山壓頂式、地獄魔鬼式、不見天日式、雞啄唔斷式、釀豬大腸式，以上所舉，僅是其中一二而已。凡教練都用心良苦，何况教而練之的是你心肝寶貝兒女。你期望他聞一知十，舉一反三，通常十之八九都事與願違，你愈心急，語氣就不自覺重了幾十磅。王師奶老爹是正牌教育學院出身，教學法滾瓜爛熟，教書時好心機，有耐性，一次唔識，可以教多十次八次，真可說是誨人不倦，但在家教王師奶時，嚴過閻羅王。小時候真係嚇到腳軟，古人易子而教，有道理兼明智。如果你是教練型的家長，請你考慮兒女的承受能力，也請你檢討你的教練模式。習作做完一個又一個，疊起來真係好似泰山咁重；方程式念完一遍又一遍，稍一猶豫，老爹塊面黑過包拯；不要以為假期可以鬆一鬆，由朝到晚念念念、讀讀讀、寫寫寫，不見天日。即使你是教練型，也希望你是一個了解球員極限的好教練。王師奶學而無術，讀書半桶水，有時私底下會埋怨老爹，要不是他的雞啄唔斷式衝擊我的學習興趣，今日可能不只會寫這些三腳貓草根文字。 24小時全天候保母 細時驚佢養唔大，大了又驚佢唔夠醒；十歲八歲仲幫佢冲涼、綁鞋帶…… 保母型：這是家長群中最多人數的一種，生仔時興一個起，兩個止，做爸爸媽媽的不單是父母，而且仲係24小時全天候保母。王師奶好鍾意睇《國家地理雜誌》的動物片，看到大象帶小象，袋鼠媽媽袋住袋鼠仔東奔西跑，或者大猩猩替小猩猩抓虱，更加明白萬物之靈的人類對子女無止境的照顧。細時驚佢養唔大，大了又驚佢唔夠醒；十歲八歲仲幫佢冲涼、綁鞋帶；返學前又同佢執書包；飲食就更加唔使講，維他命都用計數機計過，少咗怕佢唔夠營養，多咗又驚佢超標。派位唔理想就隔夜排隊去叩門，叩完一間又一間，又鞠躬又?起棚牙陪笑臉。DSE放榜後仲徬徨，送佢去外國又驚佢唔識煮食，天氣涼了又唔識加衣。 各位家長，請對號入座；各位學生哥學生妹，你的家長是哪類型？勇敢地告訴他們，你們的感受吧！ 作者簡介：不是普通師奶，家中米缸有幾多斤唔知，但對香港教育界有幾多牛鬼蛇神，有幾多「嗚喱單刀」措施，卻一清二楚。「論盡教育」絕不手軟 文：王師奶 [email protected] [Happy PaMa 教得樂 第206期]