論盡教育：通識比賽體現「大龍鳳」

2013年明報替王師奶出版《香港教育大龍鳳》一書，蓋小婦人有感整個教育界浮誇成風，人人搶住做「大龍鳳」。辦學團體帶頭做，學校跟着做，善觀氣色的校長加多兩錢肉緊兼兩安士鞋油做到加零一。鑼鼓喧天，鬥長氣，唱到街知巷聞，老師們被迫做埋一份，扮兵哥，扮梅香。家長在鑼鼓聲中迷失，以為「大龍鳳」做得勁的就是好學校。王師奶對香港教育有深情，生於斯，長於斯，眼看20年來教育這缸「混醬」混到阿媽都唔認得，「大龍鳳」歪風勁過十號風球。

之前香港電台有個名為《小學校際通識大賽2017》節目，參加學校有27間，採單循環制，最後3隊入決賽。節目的文字介紹已經「高山滾鼓」——不通不通，連王師奶的草根水準都笑到合唔埋口，點配稱官方廣播機構！不是小婦人信口雌黃，讀者諸君請評「比賽在2017年載譽歸來」，究竟佢想講乜？可能佢想講2015年辦過一次好成功，2017年再辦。王師奶這款粗人會說「2017年再冧莊」，斯文些或說「捲土重來」，點會講「載譽歸來」，你估是容祖兒剛從內地演唱完畢再在港登台咩？

常識通識 主辦方都分不清

題外話講了一大堆，言歸正傳。王師奶向來反對中學設通識科，推行初期，老師們只能跟綱要瞎子摸象，一味靠估，因為是必修科，學校唔教唔得，於是教的唔識教，出卷的唔識出，評卷的唔識評，答的當然唔識答。近年情况大有改善，但又有議員嫌試題太政治化，想將必修改為選修。王師奶好記得教統局講過小學不應教通識，依家竟然由官方機構舉辦小學通識比賽，學周伯通左手打右手。何以至此？無他，做大龍鳳囉。

通識比賽嘩眾取寵，有睇過節目的觀眾都會同意，充其量只能說是「常識」比賽，你完全感覺不到丁點兒通識味。王師奶請教過幾位現役的通識科老師，都說通識不能用作比賽，有固定答案的最多算是常識。他們對這節目的批評比小婦人嚴苛得多，四字曰之﹕「不知所謂」。王師奶認為罪不在於那幾個年輕主持，他們都很努力，但他們自己包括監製，也不知何謂通識，在通識和常識之間畫上等號。為什麼會有這個節目出現呢？大龍鳳現象而已，大龍鳳的喧天鑼鼓一日不停，香港教育一日不能反璞歸真重回正軌。

遏止大龍鳳的浮誇之風，有賴教育界自省自斂，有賴家長明辨是非，不在瓦釜雷鳴中迷失。香港小學有數百間，參加的只有27間，王師奶視為好現象。好多年前，「通識」兩字好時髦的時候，不單有些小學偷雞講通識，連幼稚園都話教通識，這淺薄的舉措確實迷倒了一些懵查查的家長﹕「我個仔讀嗰間幼稚園好深，連通識科都有得教。」王師奶寫文鬧到飛起，還寫信給教統局投訴。

未問完已識答 靠背題目

決賽一役，王師奶留意到搶答題目中，好多次主持人只問到題目的一半甚或更少，參賽同學已經作答，有些還真的答對。小婦人覺得絕無可能，尋根究柢，結果找出一個大頭佛，原來賽前有一本題目範圍，仲係成本電話簿咁厚。愈讀得熟愈着數，勝算愈高。唉！小朋友的時間就浪費在無意義的記憶中，校長們、老師們，為教育的明天，不要再搞「大龍鳳」；愛護兒女的家長們，醒醒吧，不要給「大龍鳳」騙倒。

文：王師奶