論盡教育:500萬買小學學位孰真孰假?

友報一位專欄作家寫了一篇題為《名校,應該給誰讀》文章,引起王師奶好奇。捐了錢就可以入讀名校,那不是等同買官?500萬在王師奶眼中當然是天文數字,在某些富貴人家眼中只是濕濕碎,不過是一兩個車位之費,或一個超「迷你」的200呎單位而已。如果真係公開拍賣,1000萬一個名校學位都抵到爛喇,實爭崩頭。

文:王師奶    

不信買學位 信有「人情位」

該專欄作家引述舊同學說﹕「80年代喇沙小學買位,20至50萬的確係得。」名校買位之說傳了幾十年,有人信,有人唔信。如果你問小婦人,小婦人偏向唔信可以買位;但信有人情位,又信有兩頭唔受中間受的中介人。尤其是教會學校,有好多不食人間煙火的神父和牧師,他們眼中的教友都是好人,而這些「學位老鼠」專門巴結純過法國礦泉水的校監或校長神父,一方面向心急想走捷徑的家長,勸他們事成後捐50萬或100萬(王師奶孤陋寡聞,唔知通貨膨脹到500萬)。若校監神父或牧師一時不察,中了「學位老鼠」奸計,局內人的金主家長以為真係金錢可買學位,局外人輾轉流傳,只要有「窿路」,真的可向名校買位。唉!學校食死貓,「學位老鼠」肥過隻豬。

有人話王師奶扮純情,相信所有名校都正直無私。王師奶要更正,其實小婦人心裏都有疑問,點解富貴人家的兒女都讀名校,唔通佢哋真係叻?唔信查富二代貴二代邊個唔係名校學生?我信名校有人情位,亦相信有些名校以專收權貴的子女為榮﹕「特首個孫、某議員個孫女、乜局長個女都我間學校學生。」話雖如此,老天又好公道,你老竇有錢,你阿爺有勢唔代表你一定叻。看!過去數十年,會考又好,高考又好,不少狀元出自尋常百姓家,無邊個富貴二代或三代騎馬遊街。

刻意收貧困生 增向上流機會

曾經有一段好長時間,王師奶以為所有名校的學位都給城中紳商高官壟斷,傳言中某頂尖名校更是「富人俱樂部」,直至8年前,這個偏見才消除。事緣住西環的姨甥有一個兒子要讀小一,做媽媽的緊係想入名校,替他報了五六間,又去聽晒小一招生簡介會,我記得她報了男小拔、聖保羅、喇沙、英華、高主教,她和我商量時,我心裏暗想﹕「唉!食大頭菜咩,報名費喇。」當然不會潑冷水,掃她的興。最後放榜是全部取錄,王師奶成個愕然,懷疑自己聽錯。忽然眼前一亮,覺得香港的學校好公道,唔係外面人講得咁黑暗。家個姨甥孫讀緊中三,成績好好,王師奶覺得要還名校一個公道。當然,小婦人仍相信有人情位這回事。

該專欄作家仲講有喇沙仔住九龍城寨,並不是有錢才可讀喇沙,王師奶保證絕對是事實。當年老爹和喇沙小學校長彭亨利修士稔熟,他親口對老爹說﹕「不要以為讀喇沙的一定好有錢,其實我刻意收一些家境窮苦的學生,大約20%左右,讓他們成為同學、好友,將來長大後,富有的提攜貧苦的,增加向上流的機會。」老爹尚經常提及這位逝世多年的善心傳教士。

 

王師奶
不是普通師奶,家中米缸有幾多斤唔知,但對香港教育界有幾多牛鬼蛇神,有幾多「嗚喱單刀」措施,卻一清二楚。「論盡教育」絕不手軟 電郵:[email protected]