論盡教育:仲去唔去英國讀書?

有讀者來郵問王師奶,她的兒子在英國讀大學一年級,因大學停課,加上英國疫情嚴重,4月時千辛萬苦撲了一張機票回港,自律地自我在房間隔離了14天。她問小婦人下學年好唔好去英國繼續學業,但又怕疫情未止,喺英國好易領嘢,問王師奶如何是好?該讀者問道於盲,小婦人真係唔識答你。小婦人平時雖然唔停聲,鬧完張三窒李四,事因張三李四係牛鬼蛇神,沆瀣一氣,無個正氣凜然如王師奶之流守住華容道就更加無法無天(關二哥得把口,曹操照走如儀)。不過,這位讀者的問題真不是個別事件,係好多有仔女在英國讀緊書的家長共同關心的問題。

回港避疫留學生最吊吊揈

正所謂洗濕個頭,進退維谷。繼續讀,又怕疫情未止,啲外國同學攬頭攬頸又唔戴口罩,好容易領嘢,書未讀完身先喪,死亡證快過畢業證書;如果不再去英國,正正中咗唐英年當年的名句——吊吊揈。香港的大學唔會收你,你冇考過DSE,又冇報過聯招,除非你後台好堅,又或者大學校長係你契爺。在外國讀緊中學的一樣兩頭唔到岸,王師奶有個姨甥孫,本來在頂級直資名校升中四,姨甥女係公務員,享有子女海外升學福利,食得唔好嘥。呢次大劑喇,想回頭直資,就算直資肯收你,相隔了一年課程已經不同,點追吖?橫加一筆,名牌直資經營也不易,中一中二爆晒棚,中三開始走吓一個走吓一個,中四好似大逃亡,三班變兩班甚或剩番一班左右。

專家金句:唔使急 睇定啲先

走筆至此,王師奶十分慚愧,有負來郵「求教」的那位讀者,遂轉向升學專家老友梁先生求救,怎料專家都無計,只係話:「唔使急,唔使急,睇定啲先。」專家即係專家,雖然只係拖刀一語,但一言仍可驚醒夢中人。王師奶記得曾參加過一個心理醫生的講座,醫生話:「中國人,尤其是香港人(這3個字似乎政治不正確)畀『人無遠慮,必有近憂』呢句諺語累死。心理專家話香港人就因為凡事太遠慮,所以近憂一籮籮,抑鬱症由此起。今日洗埋明日和後日的碗,唉!明日的碗明日洗,後日的碗梗係後日洗喇,今日洗定早唔早啲吖!太遠慮,所以有近憂。」驟耳聽來有啲怪怪哋,但諗落又並非全無道理。英國大學多是9月開學,𠵱家才是6月上旬,唉!如果世界饑荒,餓死都未到9月喇。可能到時疫症消失,可能已發明疫苗,可能免費注射兼送鑽石半卡,可能英國榮膺全球肺炎絕緣國,咁多可能之下,請該問道於盲的讀者放開懷抱,少憂無躁。

記住專家金句:「唔使急,唔使急,睇定啲先。」

(隔周刊出)

文:王師奶

作者簡介:不是普通師奶,家中米缸有幾多斤唔知,但對香港教育界有幾多牛鬼蛇神,有幾多「嗚喱單刀」措施,卻一清二楚。「論盡教育」絕不手軟。[email protected]

[Happy PaMa 教得樂 第299期]