Riz Farooqi

近月疫情愈見嚴峻，這是少有充滿笑聲的訪問。這年頭，大家都為口罩為物資為三餐愁煩，誰還能樂在其中？ 前本地獨立樂隊「荔枝王」主音、現「Dagger」結他手Riz Farooqi育有一名八歲的女兒Sofia，說起女兒種種，總在甜笑。不如聽聽正職是教師，公餘致力推動hardcore的Riz，是以怎樣的樂天父親視角，看待女兒停課的四月天。 內容提供：GRWTH 撰文：《GRWTH日報》特約記者林之 相片：受訪者提供 編輯：《GRWTH日報》編採組 一個WFH的老師父親 「我教嘅學校，正正係個女讀緊嗰間。以前我哋只會一齊食早餐、返學，之後喺學校就唔多會碰面，佢3、4點放學，我就直至黃昏六、七點先放工返屋企。以前夜晚先見到個女，平日主要由太太照顧。」   Riz一家三口，平日主要由太太照顧女兒，但疫情期間，他就以老師及父親身分陪伴孩子。 「不過最近停課呢兩個多月，我哋都work / learn from home，就有機會深入認識個女——原來佢有好多意想不到嘅驚喜，係我以前無發現㗎！好似我宜家每日用Zoom教書，我教小一，個女讀小二，每朝早佢都會搬自己部電腦、擔張凳仔去我後面『聽書』，我教writing，佢會一齊寫；我無意中同學生講句『大家攞枝鉛筆出嚟』，佢又會即刻遞畀我！好好笑，原來佢係我學生，又係我小助教呢。夜晚我哋成家人就一齊聽音樂，我會聽佢嘅collection，佢又聽吓我揀嘅歌。可以24小時對住佢，真係好開心！」 「佢有時都會話好掛住學校，好想返學。我哋做父母要work form home，又要照顧細路哥起居、學習同情緒，的確係好大挑戰。咁我讀幼兒教育出身，可能比較了解呢個階段小朋友嘅心理需要；同時我又係老師，又體會到宜家老師同學生比以前返學更加多connection，既可透過鏡頭睇到每個小朋友間屋係點，佢哋又會坐定定同你傾偈，連同家長都可以傾一餐。以前大家又點會咁close呢？我就用呢個角度開導個女囉。」 「我諗無論係Sofia、學生定係家長，相信一世都唔會忘記呢種咁特別、同人咁有趣嘅connection，係咪？」 一個關心社會的音樂人 「疫情停課，又或者之前發生嘅社會運動，我都會同Sofia分析。佢年紀太細，唔明？唔會啦，佢會問新聞直播啲人做緊乜，我同太太就盡量用中立角度，話佢知發生乜事；我亦會好似老師咁解釋big picture畀佢知。 」 「其實玩得hardcore嘅人，就係用音樂為社會不公不義發聲。有時我都會嬲到『爆粗』。都怕畀個女聽到㗎，惟有say sorry，解釋佢知我點解咁嬲，話daddy都會有時控制唔到情緒而講錯嘢。」   Sofia有自己的珍藏黑膠，Riz說：「她愛聽Taylor Swift，我都會跟住聽，聽聽吓又幾好聽喎！」 「會唔會擔心我啲歌好嘈、唔適合小朋友聽？自細佢都喺屋企睇住我啲歌嘅processing，反而佢見我咁認真去做歌，會好奇，留心聽我唱乜。其實我玩hardcore又好、做人又好，最hardcore嘅價值，就係freedom of anything，希望佢都會被我嘅歌同言行感染，追求 freedom 啦。」 一個長於香港的巴基斯坦人 「我呢個巴基斯坦人，喺香港生活，可以話生活喺幾個世界。平日教書，我着長袖衫，將紋身冚住，笑容滿面，係一個睇嚟好有愛心嘅老師 —— 咁當然我真係好錫小朋友啦！」   兩父女小時候總是攬頭攬頸，Riz希望女兒長大後也如此親近他。 「但放工夾Band，唱hardcore，玩滑板，會講少少粗口嗰個人，亦都係我。朋友成日話好難想像我平日咁斯文喎！」 「而喺原生家庭，我就係好傳統嘅回教徒。同時我好堅持做straight-edge（直刃族），唔食煙飲酒同濫藥。」 「不過我最享受都係做Sofia嘅daddy，佢見證我所有身分同角色；喺佢眼中，我一定係最獨一無二、最有型啩，哈哈！」 「慶幸我哋喺香港生活，好flexible，有唔同嘅生存空間。你問我香港宜家咁，有為個女打算嗎？我成日都話鄉下喺尖沙咀，我哋可以走去邊？」 「我喺香港掙扎咗四十幾年，先有今日嘅我。有困難先會更strong，我相信個女同我都一樣。生命總有不足同掙扎，點會完美，你話係咪？」   香港本地搖滾樂隊Seasons for Change的作品，是Sofia最近停課期間的至愛，當然也是Riz的推介。 *註：以上訪問全以廣東話進行 內容提供：GRWTH 社區 刊載於︰GRWTH app