論盡教育﹕港華與華小的悲劇

港華申轉直資失敗，不幸給王師奶烏鴉口講中。以小婦人輕浮性格，一定鬆毛鬆翼，自詡靈過廟街盲公陳。但今次港華失敗，心戚戚然，用黯然神傷去形容亦不為過。就本文命名，忐忑不定，曾想用《港華與華小的鬧劇》，鬧劇二字略嫌不敬，亦不能表達內心傷感，故以《港華與華小的悲劇》名之。

小婦人之所以黯然神傷，並非因港華轉直資失敗，而在港華、華小之間的爭執。同是耶穌會名下，又彼此直屬關係，雖云受直資不公平制度形勢所迫，亦不應淪為意氣之爭，兄弟鬩牆，家醜外揚。王師奶一來傷感於教育界中人全無君子相待氣度，二來傷感耶穌會辦學良好聲譽之受損。痛定思痛之餘，是否中、小學雙方謀求修補裂痕？唔係噃，「脫鈎」之說，甚囂塵上。

這些淺薄言行，見諸市井之徒已不可接受，今竟見諸化雨春風的黌宮學府中，何斯文掃地至此！王師奶不禁問：「香港真係淪落到這個地步？」這是教育界的悲劇。

中、小雙方各有立場，無所謂對錯，中學要擴闊收生層面，錄取成績較佳學生，何錯之有？小學要保障85%學生直上港華，依足遊戲規則，理直之至，但玩到以公開信揭對方瘡疤，還要祝對方校長「身體健康」，講得輕些，是牛頭角街市賣菜三姑的刻薄口吻；講得嚴重些，是鵝頸橋底打小人行為。這些淺薄言行，見諸市井之徒已不可接受，今竟見諸化雨春風的黌宮學府中，何斯文掃地至此！王師奶不禁問：「香港真係淪落到這個地步？」這是教育界的悲劇。

港華淪為華小「水泡」

華小最初反對港華轉直資，說港華專業誤判；但後來支持港華轉直資的理由，根本和專業誤判大纜扯唔埋，所不同者是協議9年過渡期中，讓79名華小畢業生憑直屬關係直入港華而已。講到底，入了華小，人人背脊孭住個救生圈，只要唔好考得低過85%，入港華定過抬炸彈。如果我是華小家長，自己個仔又好叻好叻，我會替個仔揀一間名聲好過港華的中學。經今次華小揭港華底牌後，此風更盛，港華此後變身為華小的大水泡。王師奶相信華小的老師都有職業操守，都會盡心盡力教好學生，不會因有水泡在旁而放軟手腳，但學生考試成績如果Band 2多過Band 1，港華要為維持全英語授課的顧慮並不多餘。

「轉直資可以收錄更多貧苦學生」，這論點真係匪夷所思，呃鬼食豆腐

王師奶於本年1月2日在本欄《港華中小學的爭拗》中說過：「王師奶覺得兩位校長疏忽了一點，轉直資不是你們兩人的事，是要教育局批准的。前數年聖保祿中學及聖士提反女子中學申請被拒，港華轉直資估計也非一帆風順。」小婦人的預測建基於此，加上過渡期9年，曠日持久，兵家大忌，有邊個局長有咁好耐性睇你9年吖！第二點港華話「轉直資可以收錄更多貧苦學生」，這論點真係匪夷所思，呃鬼食豆腐。資助學校唔使交一個仙學費，直資任你點秤法，一蚊就係一蚊，十蚊就係十蚊，怎會可以收錄多啲貧苦學生？第三點就最要命，港華老師支持及反對轉直資的各佔逾四成，即係話近半老師反對。想當年，羅范推直資時，反對最劇烈的是老師不同意，因學校轉了直資，性質上變了私校，教師職業安全失去保障，學校對人事任免有絕對權力。講得極端些，學校想炒你，補一個月人工就拜拜，所以常額教師或年資深的教師多數反對。

王師奶期望港華及華小以和為貴，重塑祥和氣氛，耶穌會神父施展辦學才華及豐富經驗，挽狂瀾於既倒。

小道消息，若申請直資成功，明年將有一位校長辭職（既云小道，信不信由你）。

作者簡介﹕不是普通師奶，家中米缸有幾多斤唔知，但對香港教育界有幾多牛鬼蛇神，有幾多「嗚喱單刀」措施，卻一清二楚。「論盡教育」絕不手軟

文：王師奶 [email protected]

[Happy PaMa 教得樂 第201期]