阿麥書房

Rolling Books創辦人James 歷來愛書的人很多，但像前「阿麥書房」老闆莊國棟（James）一樣，愛書愛到開書店卻經歷生意失敗﹐還清債務重新上路後，又再搞社企推廣閱讀，是什麼令他對書如此情深?「現實並唔係想像中咁浪漫，我一路以來嘅經歷可以話係同書愛恨交纏。」James如是說。   峰迴路轉的書緣 二千年初本地獨立書店的景象興盛，在文化界有名的「阿麥書房」當年賣書之餘，亦舉辦不同活動深度推廣閱讀，四年間在小小的書店辦過不少書展、戲劇演出、視覺藝術展覽、音樂會等等，目的是想讓讀者在閱讀之餘，能找到更多由書延伸出去的興趣。「當時搞得好成功， 試過好多新嘢，好多人讚好，覺得好有新意。但書店最後都係維持唔到！」James感嘆地說。 曾經歷書店「執笠」及欠債，現在重新出發，以書為伴搞社企，將閱讀連結社區不同階層的人。 「對於一個開書店嘅人嚟講，我同書嘅關係並唔係純粹書同讀者咁簡單。當時會諗，賣咁多好好嘅書又點，所謂賣得好好，一日畀你賣到五本，但連租都交唔到。推介好好嘅書，原來係冇用。」書店結業並欠下一身債，及後四、五年James亦因此差點陷入抑鬱，同時亦令他和書保持距離，好幾年時間没有再進出書店。 「再掂番書有一種熟悉但又逼生的感覺。生意失敗對我嚟講係一個好大嘅打擊，呢段經歷我好想刪除咗佢，唔想再掂書，但到最後我始終磨滅唔到呢啲經歷對我的影響，咁我不如擁抱失去書店嘅經歷，令自己更堅實。」James坦言，現在已有勇氣和別人分享曾經開書店的經歷和得着。   以推動閱讀連結社區 重新上路後，他還是選擇了以書為伴。James說，書很「百搭」，亦可透過書本切入不同的公民教育議題。一年前，他成立社企——滾動的書 (Rolling Books)，「成立 『滾動的書』其中一個動機，係希望以書為切入點，令不同嘅族群，例如來自基層家庭或少數族裔嘅小朋友，可以透過接觸書而得到社會嘅認同。我哋收集書轉贈畀佢哋，中產家庭無償捐出屋企嘅書，呢啲行動連結到基層同中產。」   James創立的「Rolling Books」不時舉辦讀書會，像這次透過分享童書，讓少數族裔學童有機會接觸中文字。（圖片由受訪者提供）   少數族裔學童學習中文是個大難題，James認為校園以外要多做工作，他訓練一班哥哥姐姐給少數族裔小朋友講故事，從而增加他們在課外接觸中文字的機會，同時令他們感受到原來社會上有人關心他們，從而使他們和社會有所連結。 他又找來小丑以遊戲形式，跟基層小朋友共讀以「食物公義」為題的繪本《風吹過粟米田》，「喺嗰半個鐘，佢哋覺得同小丑玩好開心，但其實我哋已經種咗呢啲種子，畀佢哋知道原來睇書可以咁開心，呢個係書同快樂嘅連結。」   James曾以「食物公義」為題的繪本《風吹過粟米田》與基層小朋友共讀，把大自然、人與社區結連起來。（圖片由受訪者提供）   閱讀氛圍最重要 近年本地幼稚園及小學大力推動閱讀，James認為﹕「學校推廣閱讀唔成功，係因為方法唔到位，嚟嚟去去搵作家分享，又要寫閱讀報告，小朋友一諗起書就會聯想到悶。」「滾動的書」把以童書改編成的舞台劇帶進校園，令小朋友觀賞舞台演出之餘，又對書產生興趣。 閱讀可以很「動」，像這種以故事劇場形式走入小學校園，是Rolling Books其中一種推動閱讀的方法，深受學生歡迎。（圖片由受訪者提供） 作為家長， 身為一孩之父的James又是如何引領兒子像他一樣愛上書呢﹖「我從來冇好積極主動咁鼓勵佢要睇多啲書，或刻意安排佢去睇咩書，甚至同佢共讀嘅時間，我肯定比好多家長少。我會相信，父母本身好鍾意書，成日拎住本書睇，小朋友自然就會被感染。」他指，很多家長自己從來没有或很少看書，卻整天叫小朋友多看書，一點說服力都沒有。 另一個被動但James認為反而是最有效鼓勵小朋友閱讀的方法，是家裏大量藏書。他說﹕「只要屋企有好多書，唔一定要買，就算圖書館借返嚟都得。就咁擺晒喺度，小朋友一有空檔，或突然某一日對某個題材有興趣，佢自己就會去攞書睇。我想講嘅係氛圍，閱讀嘅氛圍最重要！」   改變世界從閱讀開始 被問道有何好書推薦？James拿出一本厚厚的《101 Small Ways To Change The World》(中文版《101個好習慣﹕讓小孩子改變大世界》)，書中介紹了101個小方法，就是在日常生活中作出一些小改變，便足以改變世界。「好多時候大家都會覺得小朋友咁細個冇咩可以做到，但呢本書可以啓發到小朋友，只要跟住書中嘅建議做，或者諗一諗自己同社區嘅關係，再思考點樣去做第102、103或104個行動去改變世界。」 James推介的《101 Small Ways To Change The World》，小小的，卻內藏改變世界的大智慧。 內容提供：GRWH 刊載於︰GRWTH app