論盡教育：教育希望指數
現時並無一個有江湖地位的調查機構為香港教育設立「教育希望指數」，這完全是王師奶看到國際民意調查機構蓋洛普（Gallup）宣布香港的「希望指數」（Hope Index）而聯想翩翩。
香港如果真有「教育希望指數」，市民（即是家長）可以憑指數監察教育局長的表現，假設李國章50點、孫明揚52點、吳克儉23點、楊潤雄53點，單眼佬睇老婆，一眼見晒，誰優誰劣，無所遁形。當然，如果局長面皮夠厚，或者「爛撻撻」，倒彩當喝彩，亦奈佢唔何，這就是特首無知人之明了。王師奶相信人要面，樹要皮，無人鍾意上羞考妣，下禍子孫，出街要帶面具，唔好畀人認得廬山「憎」面目。
幾個月大要搵校 點敢生仔
假設教育希望指數的起點是100點，王師奶畀現况30點，甚或更低。話明係「希望」，即係展望將來，請話畀小婦人知，香港教育的希望何在？問吓香港市民，有邊個會豎起隻手指公話頂瓜瓜，無得彈？年輕男女唔敢結婚生仔，最大壓力不是居無所，而是讀無校。BB出世幾個月，父母就要搵學校報名掛號，否則蘇州過後無艇搭。一歲多啲就要面試，點面試吖，除了睇吓個BB個樣四唔四正，父母夠唔夠中產，仲可以面試啲乜呢？報考一間肯定唔夠，最佳策略是漁翁撒網，或者學韓信點兵，多多益善。搞到啲父母食不安、寢不寧，單是入學困難就要減指數20點。當然這是指一般市民而言，如果你是高官名流、完全無問題，讀國際學校喇。
可能歷屆特首的兒女都已經海外大學畢業，所以對本港大學學位短缺毫不關心，有錢嘅去英國、美國、加拿大或澳州，無錢的就在本地氹氹轉，在什麼副學士、毅進、自資裏焦頭爛額。講開又講，點解啲特首、教育一哥、名流富商的子女全部崇洋，唔吼香港的大學？原因有兩個：其一是驚仔女成績唔達標，考唔到大學，無face，所以早早放洋；第二個原因可能是睇唔起本地大學，橫豎我的仔女不會讀香港的大學，與其增加學額益啲草根，不如掟錢去填海。心態可悲可恥，教育希望指數又減20點。
讀中讀英唔到自己話事
香港學制本來好單純，分私立、公立；中文學校、英文學校。辦學的人鍾意辦中文或英文，讀書的人鍾意讀中文或英文，全部悉隨尊便，無人阻撓你。?家唔得噃，讀中讀英唔到自己話事，政府話你讀英就讀英，讀中就讀中；辦學亦一樣，想辦英文中學，唔得噃，四班中一，政府係要你開一班或兩班中文，因為你收生不符標準。早餐想食西多士雙蛋，唔得，一定要食白粥油炸鬼。一國兩制似乎有點波濤，但一校兩制就愈來愈鮮明，辦學和讀書自由的喪失，點都要扣20點。
王師奶最勞氣是直資學校的定位，是羅范椒芬好心做壞事旁生的怪胎：說它是私立，不全是；說它是公立也不全是，但教育局眼中當它是私立，所以它有私校的全部自由。以前私立學校要領商業登記證，根本是一盤生意，生意好盆滿缽滿，無生意執笠閂門，每一個仙的收入和支出都係自己荷包。但直資唔係噃，除了可收費外，又有政府公帑津貼，咁仲可以算係私立？而且津貼不少，逐個人頭計，每年津貼5萬多元，這是什麼政策？說它是教育怪胎絕不為過。扣它50點都嫌少。
直資學校本身無罪，是政府的政策「盲佬貼符」。
作者簡介：不是普通師奶，家中米缸有幾多斤唔知，但對香港教育界有幾多牛鬼蛇神，有幾多「嗚喱單刀」措施，卻一清二楚。「論盡教育」絕不手軟
文﹕王師奶
[Happy PaMa 教得樂 第225期]