論盡教育:不要把矛頭獨指楊潤雄

教育局長楊潤雄呢排好忙,初中歷史獨立成科引起爭拗,有人話政府想乘機洗腦,呢張牌當然會自動波飛去局長身上;有人揭穿局長兩個孩子就讀國際學校,唔使考TSA唔在講,連局長話要大力推行的國民教育及今次歷史科都唔關佢哋事,自動免役。

文:王師奶

楊局長的孩子被傳媒踢爆在國際學校讀書後,部分家長梗係MM聲喇,針唔拮到肉唔知痛,小三TSA操到夙夜匪懈,老豆老母陪太子讀書,做練習;讀國際學校好似入咗法租界,國民教育只洗後面拖條大辮的人嗰腦,歷史科更加唔關佢哋事,話之佢六七、六四抑或九一一。大樹好遮蔭,「國際」兩字似免死金牌,同是黃皮膚、黑髮、黑眼晴,身分證同是三粒星,同是一個叫林鄭月娥的特首,點解做咗教育局長咁多Jetso?王師奶理解家長們的怨氣,也同情楊局長的處境。把矛頭獨指楊潤雄不公平,如果他不是教育局長,只是普通高級公務員就天下太平,無人針對他。

送仔女讀國際學校 無錯!

楊局長接受now新聞台節目訪問時表示,因為曾被派往外地工作,當時認為香港教育制度「複雜」,亦未有詳細考慮,便為孩子選擇一間可以就讀多年的學校。王師奶認同局長的選擇,合情合理,而且高級公務員的兒女有教育津貼,讀國際學校亦毋須額外支出,等於唔使錢有波鞋送,點解唔揀NIKE而去揀本地製造的「白飯魚」?好多高級公務員都是咁做,一係早早送佢去英國讀寄宿學校,學費全免兼來回機票,不享用這些福利是傻瓜,楊局長毋須自咎。王師奶總愛雞蛋裏挑骨頭,楊局長認為當時香港的教育「複雜」,所以將孩子送入國際學校,這未免有點矯情。香港教育自回歸以來,幾時都咁「複雜」,而且愈來愈「複雜」,難道此時此刻在你領導之下的教育不「複雜」嗎?全港家長包括小婦人正期待局長將香港教育返璞歸真,唔好搞到咁「複雜」。

局長在訪問中愈答愈玄,他說兩個孩子中若有一個在傳統學校讀書會更適合。唉!局長,你估去葡京乎?一個買大一個買細;抑或買股票做套戥。小婦人唔明點解說若有一人讀傳統學校會更適合,除非局長要將一個孩子做白老鼠,為香港教育作試驗品。小婦人並不是說傳統學校唔好,看!我們的特首林鄭月娥,你閣下,三司十三局好多官員都是傳統學校培養出來。局長講講下講到王師奶心裏充滿希望,原來楊局長唔使好似佢舊上司吳克儉要周遊列國考察教育,都知道香港教育的缺點。他說因為兩個孩子在國際學校讀書,相信可將國際學校理念及氣氛引入本地學校,又承認學生壓力太大,要考慮改善小學及初中學生目前面對的壓力問題。這話出自掌管教育龍頭的教育局長之囗,自然重逾千鈞,倘能成功,小婦人願折壽三年(太長驚睇唔到),日日焚香禱告,祝願局長將乾坤扭轉,造福萬千學子。

局長唔似口輕輕,吹水唔抹嘴之輩,王師奶亦知前路崎嶇,望教育界一齊大叫:「局長加油」!