有話說﹕1月1日 為SEN學童起跑

話咁快就嚟年尾,新嘅一年已經向我哋招手啦!有冇諗過喺1月1日呢個新年假期,做一件好好玩又有意義嘅事呢?

相信大家都知道特殊教育需要(SEN)嘅學童,無論喺學習同生活上,相比一般小朋友會遇到更多困難。大埔浸信會社會服務處一直為呢班小朋友同家長提供支援服務,今年初佢哋搞咗一次慈善跑籌募經費,有近250人參加,算係好成功;今次佢哋再接再厲,喺1月1日舉辦「新年愛心慈善跑2018」。

首設寵物組 人寵一齊跑

除咗同上屆一樣設有親子組、公開組等組別外,今次嘅一大特色係加入「寵物組」。因為呢次活動係同大埔超級城合辦,商場方面仲會負責支出活動基本開支,令籌募得嚟嘅款項可以全數捐出;而咁啱商場做緊爆炸狗主題佈置,所以順理成章,等主人同動物可以一齊做善事!

Mama覺得另外一個好有意義嘅元素,就係慈善跑唔單止係跑步咁簡單,聽大埔浸信會社會服務處社會服務協調主任吳健文講,參加者需要喺唔同check point挑戰一啲任務,體驗SEN學童平時遇到嘅困難。「例如參加者要於一堆3字之中找出8字,體驗專注力不足及過度活躍症學童專注上的困難;又或者要去猜一段韓文的意思,其實猜中的機會好微,情形就等於有讀寫障礙嘅小朋友閱讀文字時遇到嘅問題,因為佢哋睇中英名就好似睇火星文一樣。」吳健文話希望透過呢啲活動,加深大眾對SEN學童的認識,Mama就決定帶仔女去玩吓啦,你呢?

■新年愛心慈善跑2018

日期:2018年1月1日(周一)

時間:中午12:30至下午5:00

地點:大埔市中心

獎項:最快完成獎、最高籌款額獎、最佳團隊造型獎、最佳寵物造型獎

報名及籌款截止日期:12月22日(本周五)

網址:goo.gl/da6RMx