新書共讀﹕長頸鹿被當櫈坐 「點解點解」咁有趣

讀樂樂﹕長頸鹿被當櫈坐  「點解點解」咁有趣I am not a chair!

作者、繪者:Ross Burach

出版社:Harpercollins Childrens Books

小女兒就快4歲,感恩她對閱讀的興趣有增無減。由被動地安排閱讀時間,到主動要求閱讀,到自主在圖書架找尋最愛。當然,小女兒有她的喜好:色彩繽紛、角色活潑、有動物、意想不到的橋段。今次,爸爸代為出手,選了這本I am not a chair!。

文︰十豆川

幫小朋友揀書,從來不是一件容易的事。今次我好有信心,要動物,有整森林的動物;要活潑,主角長頸鹿抵死風趣;要橋段,長頸鹿同櫈喎,你諗到?掂呀!今次一定掂!當此書出現在阿囡面前時,她已經急不及待搶過來,自己翻書看。轉眼就傳來無限個為什麼。「點解河馬……點解長頸鹿……點解點解?」因為有了這些「點解」,阿囡自然會乖乖坐定聽完這個故事。

故事吸引固然重要,但小朋友覺得故事是否吸引,先需要閱讀一兩次。那第一次點算呀?其實小朋友睇事好表面,繪本圖畫是否吸引就變得非常重要。封面的用色非常搶眼,起角的長頸鹿和超長牙的兔仔都十分可愛。我問阿囡長頸鹿和兔仔可愛嗎?她回答了她看到的,「佢哋對眼好搞笑」,伴同她努力模仿的樣子。阿囡,你都好搞笑呀!

「呢隻咩嚟㗎?」

「長頸鹿呀!」

「唔係呀,係一張櫈呀!」

故事主線簡單,一隻好像櫈的長頸鹿被其他動物當作櫈。最困難是開始時要阿囡先接受「長頸鹿被誤會成為一張櫈」,阿囡的想像力還有待改進。長頸鹿初到森林,牠可能是森林的第一隻長頸鹿,眾動物初見此物,只憑外觀直覺認為「長頸鹿」是一張櫈。大家若無其事坐在長頸鹿上談天,一個如是,兩個如是。長頸鹿不知哪裏來的耐性,忍完一個又一個,耐心等待一個被看見的機會。

可惜,從來沒有,從來都沒有,教我緊張得,心跳這麼久。

大聲說出自己做好自己

長頸鹿終於要爆啦!點知……「ROAR!」果然人生是一場沒有完結的賭博。撥開雲霧見……煙囪。被誤會成一張櫈雖然好失落,但身處危難之際,或許這份失落能救你一命。長頸鹿由保持冷靜地等待,到失去理性地開口一博,「唔該……」嘩!點解張櫈會說話,媽呀!由呢一刻開始,長頸鹿終於做回一隻長頸鹿。我估森林裏的動物學會了,長得像一張櫈而且會說話的動物,就是長頸鹿。

森林回復平靜,眾動物又聚在一起玩。當然,長頸鹿今次是以長頸鹿身分參與。不過,望下望下,奇怪。長頸鹿,你坐住塊石頭好似有點奇怪喎。哈哈哈!阿囡自動地大笑起來。你終於明白被誤會成櫈是真的。我問:哎吔,咁點算好呢?「好似長頸鹿咁開口大聲同人講咪得囉。」

對了。被人誤會不可怕,也不要全怪罪於人,大聲說出自己做好自己,世界不會誤會你的。

■編按:各位爸媽、小朋友,你想跟我們分享好書嗎?不論是父母讀的教養書籍或是孩子喜歡的圖書,我們都歡迎你把心愛的書寫成書評,中英文書皆可,每篇字數為800至1000字,一經採用,可獲薄酬。稿件可電郵至[email protected],並留下姓名及電話,主旨請註明「童讀好書.讀者推介」。